EMMANUEL

Topa in kamsangpa tung tawnin a gensa thu a tun' theihna dingin hih thute a piang ahi hi. Tua a genna-ah, “Nungak khat gai-in tapa khat nei ding a, ama min dingin Emmanuel kiphuak ding hi,” ci hi. Emmanuel a khiatna in, eite tawh Pasian hong omkhawm hi, a cihna ahi hi. Matthai 1:22-23

IMMANUEL KICI DING HI

Matthai 1:22-23 i sim ciang, Immanuel min kiphuak ding hi cih kamsangpa in a genkholh khit van tung mi in a kipsak kik ahi hi.

Isaiah 7:14 sim leng, Isaiah i kasang na tawh a gen tu, "Tua ahih ciangin Topa mahmah in note tungah lim khat hong pia ding hi. En un, nungak khat gai-in tapa khat nei ding a, ama min Immanuel kici ding hi.

Mattahai 1:22-23 leh Isaiah 7:14 i et kop ciang, Matthai sungah Isaiah i kamsang na tawh a gen kholh lim lakna hong picing suah ahihi.

Zeisu a suah ma'in genkholhna leh limlakna tawh kamsang te genkholh minte pawlkhat:

1. Lamdang Thulakpa, Vanglian Pasian, Tawntung Pa, Nopsakna Kumpi kici ding hi [Isaiah 9:6]
2. Amah [Zeisu] a kilawh dingin a min, 'Topa, Eite' Diktan'na,' ci-in a kiphuak ding hi [Jeremiah 23:5-6]
3. Amah a kisapna dingin a min ‘ Topa, Eite' Diktan'na,’ ci-in a kiphuak ding hi [Jeremiah 33:15-16]

Atung a min teng leh Immanuel cih minte et kawm in Luka 1:32 in zong bang ci na gen hiam cih leh 'Amah milian hi ding a, A Lianpen Pasian' Tapa kici ding hi' ci'in genna Luka 1:35 ah 'Tua ahih manin a hong suakding a siangtho naungek pen Pasian' Tapa kici ding hi' na ci lai hi.

Atung a thute i sim ciang, kamsangte, nung zui te Zeisu leitung ah hong suak ding vai a genkhol te ki thutuak lo um a hiam, ahi kei zong a zaakdan, a theih dan uh kibang lo hiam ci'in ki ngaih sun kha ding hi.

Zeisu akisap min tak tak en leng a tunga min te khat tawh zong na kisam lo hi. Ahih hang, Zeisu amin 'Immanuel' ki ci ding hi aki genkholh ciang, 'Pasian ahi Zeisu eite bang'in leitung ah hong suakna hang, eite tawh hong nuntaak khopna leh eite a'ding hong sihna hang'in Pasian ei tawh hong teng hi cih na hizaw a, a min tek tek a kisam hilo hi. Tua mah bang'in 'Lamdang Thulakpa, Vanglian Pasian, Tawntung Pa, Nopsakna Kumpi, Eite' Diktan'na' kici ding hi aki cih ciang'in Zeisu i sepding, nuntaakzia, a mission leh amah maban ding ten hong pulaakna na hi hi.

JUDAH MITE MIN PIAK ZIA

Zeisu Judah ngeina sung ah hong suak ahih man'in Judah mite ngeina en pak ni.

Zomi te bang mah in Judah mite'n zong min nakimawk piak hilo hi. Tate ahi zong, mi khat min apiak uh ciang, min apiakna hang'in anui'a thute hong pulaak hi:

1. Tua mi pa/na thu ki telgenna [bang mi hiam]
2. Tua mi pa/nu i gamtat zia leh om zia hong pulaak hi
3. Tua mi pa/nu i mailam nuntaak zia ding genkholhna leh
4. Tua mi pa/nu anuntaak zia ding thungetna tawh lametna
5. Tua mi pa/nu min tawh gupkhiatna ngah ding ahi kei leh gupkhiatna taang thei ding

Genteh na'in, Noah bang thungetna tawh min ana kipia ahi a [Piancilna 5:29], akhiatna in 'hi mipa in nasepna i gimna pan thawldamna hong puak ding pa' cih akiatna ahi hi. Amin apia te geelna ah Noah hangin amah innkuan lokhawh gimna azaang sak zaw ding'in na lamen ahi hi [Radak].

Tua a ban in Judah lai-at khat [Arizal] in min tawh kizui'in bang gen lai hiam cih leh "mi khat i min tawh kizui'in mite'n tua mipa/minu i gamtat zia leh om dan zia leh tawng hong pulaak' hi ci hi.

ZEISU KHRIH

Bang hang'in Zeisu Khrih ci'in amin kisam hiam cih i dawng ma in Zeisu cih mipa zong hi Pasian Tapa zong ahi nuntaak zia en leng. Zeisu pen kamsang khat hi beklo hi, Pasian mihing in hong piang ahi a, gupkhiatna thu tangko ding bek hilo'in gup khiatna amah tungtawn in i ngah nading a nuntaakna hong pia khia pa a hi a, Pasian sa thau nilh sa Pasian tapa ahi hi.

ZEISU KHRIH min khiatna;

• MESSIAH or KHRIH [manglai in CHRIST], Koine Greek [Lai Siangtho thuciam thak ki-aatna lai] Χριστός [Khris-tos] ci'in na ki aat hi. Khrih ci a, ngaih sun khol lo'in i lawh mawk mawk hang'in, Khrih cih akhiatna pen:

Pasian sa thau nilh Mipa, Adan hun pan'in mite lamet, kamsang te genkholh ahi Messiah, Kumpi ding in Pasian in sa thau a nilh khit Mipa ahi cih na hi.

Tua ahih man'in Khrih min i lawh sim'in Khrih pen kamsang, siampi leh kumpi ahi hi cih i phawk ding kisam hi.

• ZEISU [manglai in JESUS], Koine Greek [Lai Siangtho thuciam thak ki-aatna lai] Ἰησοῦς [Iesus], Hebrew Yeshua (ישוע)i akhatna pen:

Zeisu leh Joshua [Thuciam lui sung] min i akhiatna pen a kibang ahi hi, akhiat na pen " A mi te amawhna pen gumkhia hi' cih akhiatna ahi hi. Hih min bang hang amh kipia hiam cih leh, leitung hong kumsukna, mawhnei mite tawh hong kikholna leh anuntaakna piakhia'in a sihna leh anuntaak na i limlaak na min ahihi.

Matthai 1:21 "Amah in tapa khat hong nei ding a, tua tapa in ama mite a mawhna uh panin honkhia ding ahih manin ama min dingin Jesuh na phuak ding hi,” ci-in thu a gen hi."

Zeisu Khrih Cih Min In Bang Hong Gen Hiam:

1. Khrih pen Pasian piak thuneihna, sawlna, phalna, sa thau nilhna, za piak na tawh ei te hong gum Pasian ahi hi.
2. I biak Pasian pen hong gumpa Pasian a hi.
3. Gupna i cih pen Zeisu Khrih ahi hi.
4. Zeisu khrih hong Gumpa Pasian lo tawh, lametna a nei lo mi hing te i hih lam hong thei sak hi.

ATAWPNA IN

Zeisu Khrih pen Pasian ei tawh hong om khawm cihna hi beklo a, Pasian i sathau nilh mawhna pan hong gumpa Pasiah ahih man'in Zeisu Khris ci'in amin akisam ahi hi.

Mite ngaihsutna ah, Pasian i kisap dan kibanglo in, pawl khat te'n hauhna, nopna leh gual zawh nading leh ompih na ciang bek in kisam i sa a, ahih hang'in ngaih sun tak tak leng; "Pasian i kisapna pi pen thu sittel leng, thudang teng khem peuh sang'in mawhna gu sihna pan'in Pasian sawlna tawh ei te sihna pan hong gumkhia ding Pasian i kisap a thubulpi pen hi."

Leitung mite min, gen teh na bang Obama ci leng a gamtatna, nuntaakna leh sepkhiatna tawh kizui a min pia hileng, min hoih leh min pha tampi om ding ahih man'in Obama in i theih ziauh pen a mah ading hoih zaw hi.

Zeisu Khrih i gamtatna, nuntaakna, gualzawhna leh sepkhiatna te i nuntaakna ah hong kilang ciang Zeisu Khrih ei ading "hong om pih pa hi a, hong honkhia pa hi a, suangpi hi zel in' min khat sung bek ah i guan ding hong gumpa Zeisu Khrih kita zo lo hi. A thu thei sem sem, Laisiangtho sim sem sem a min hong tam sem sem a, i nuntaakna sung mah mah ah zong Zeisu Khrih hong kilang sem sem hi.

Ahih hang'in, leitung mite kisap pi pen "Mawhna pan'in hong gumkhia ding Gumpa Pasian ahi", tua mah bulphut pen a Thuciam Thak sung ah "Zeisu Khrih" ci'in a min kipia ahi hi.

Lai-at: Steve Mung Munsuang 
Mobile Numbat: +61474 824 168

Email: admin@laisiangthothuman.com
Facebook page: https://www.facebook.com/laisiangtho.thuman/ 
Blogger: https://laisiangthothuman.blogspot.com.au/