Lai Siangtho simtel ding thupi hi bang hang cih leh Lai Siangtho pen Pasian Kammal ahi hi. Lai Siangtho I hon ciang, Pasian’in hong gennop thu a sim hi hang. Vaan leh lei a bawl Pasian in hong gennop thu teng i sim sang a thupi zaw bang om ding hiam?
Lawm ngai khat in a ngaih mah mah khat i lai khak kin tak leh lungluut tak in a sim mah bang in lai singtho lungngai tak in i sim ding hi.
Matthew 23:37 ah bang gen hiam cih leh Pasian in ami te it ahih manin amah tawh ikizop kiik ding ngai hi. Tua ahih manin Pasian in amah bawlsa mite a itna leh a gupkhiatna thu a theihsak nading a Lai Siangtho hong pia hi (Johan 3:16; 1 Johan 3:1; 4:10).
Galkap te’n galkap ukpipa sawlna a telnop bang in Pasian deihna i telnop ding kisam hi. Thu tel lopi, kizui thei lo hi. Pasian sawlna i zuihna hang’in Pasian’in minthanna neih nading leh amah deihna tawh kizui in i nuntak nading hi (Late 119). Pasian hong sawlnate Lai Siangtho ah kimu hi (Johan 14:15).
Lai Siangtho i sim ciang, setnate a siammi te’n setvante a puah theih nading manual laibu simmah bangin sim ding hi hang. Bang hang hiam cihleh, leitung ah siatna tampi om hi, Lai Siangtho in hih siatnate (mawhna) kipatna mukhia bek hilo in, siatnate ading genmaina (Zeisu Upna) nei hi. Rom 6:23 ah “...mawhna in thaman hong piak pen sihna hi a, ahi zongin i Topa Jesuh tawh i kipawl manin Pasian' hong piakkhong pen nuntak tawntungna ahi hi” ci hi.
Mawtaw hawl siam nading lampi limlakna tuam tuam te hanciam takin i sin mah bang’in, Chris i lampi ah tang tak in i zuih theih nading Lai Siangtho sungah siatna i tung loh nading in Pasian piak limlakna tuam tuam te hanciam takin i sin ding kisam hi. Lai Siangtho in i nuntakzia ding lam hong lak a, ciimna leh bitna lampi hong hilh hi. (Late 119:11, 105)
Lai Siangtho i sim ciang, huih pi guah pi lakah a dong tuah khat in khuahun sia pan a suah taak theih nading lampi zong mah bang in, suahtakna lampi Lai Siangtho sung zong ding hi hang. Lai Siangtho in hun nung ding thu gen khol hi, a piang ding thu te ahi zong anunung thu khenna ding thute (Matthai 24-25) leh thukhenna leh siatna pan kipelh dan ding zong gen hi (Roma 8:1).
Laisim mi khat in, adeih mah mah laibu a sim ciang, a thu leh a lai at pa/nu i lungsim a tel theih nading a lungsim khempeuh tawh a sim mah bang in Lai Siangtho sim ding hi hang. Lai Siangtho in Pasian leh amah i Vangliatna, Zeisu Chris tungtawn in hong pulak hi (Johan 1:1-18). Lai Siangtho sim sem sem, tel siang sem sem, Lai Siangtho hong pia Pasian thei sem sem ding hi hang.
Zeisu nungzui Philip, Gaza khua lam khual a zin laitak, Kha Siangtho in Isaiah laibu a sim mi khat kiang ah apai ding sawl hi. Philip i tua mipa kiang pai a, tua mipa i sim lai amuh ciang a thupi mah mah dotna khat tua mipa kiangah dong hi. Philip in tua mipa kiangah “tua na sim thute na thei hiam?” (Sawltak 8:30). Upnaman akipat theih nading thuman theihna a thupit zia Philip in thei ahihi, tua ahih manin tua mipa kiangah a dongh hi.
Lai Siangtho thuman thei kei leng, Pasian deihna ki theilo ding hi, Pasian deihna tawh kizui nuntakna neilo ding, Pasian thuman theilo ding, Pasian zong umlo ding, Pasian deihna i nuntakna ah tang tunglo ding hi.
Lai-at: Steve Mung Munsuang
Mobile Numbat: +61474 824 168
Email: admin@laisiangthothuman.com Mobile Numbat: +61474 824 168
Facebook page: https://www.facebook.com/laisiangtho.thuman/
Blogger: https://laisiangthothuman.blogspot.com.au/
Comments
Post a Comment